Gen 40 | ATA | STEP | Iosepu mulai muxolu no ano ne maxuvee malaxo uasi, ia mumalei la mino'a ta mitema sou xaixai tamei noxou tatananu tuala ne Aixiputo mine'e mi'unane'i no tani noxou itema sou xaixai uuli noxi'a ta mitema sou 'oto'oto. Anu itema tila ne ilo'a ta mitemau ixoxoo ane sou isaxisaxila'u taasou tatananu tuala ne Aixiputo. Ta mitema sou xaixai noxou tatananu tuala tamei ne, vile anu tila noxi'a ta mitema sou isaxisaxila'u uaini noxou tatananu tuala xe vile ne anu tila noxi'a ta mitema sou isaxisaxila'u la'ilalixu tatananu tuala. Ane'i ilou misusu no anu 'ilixo vile masua la tatananu tuala la'iaxui'a ilou misevile la sou mulai mu'unalailixa'a no taasou e Iosepu mulai mu'unalai no anu.

Genesis 40

Itema sou Usaxila'u La'ilali Ilou Itema sou Usaxila'u Uaini

1 Iosepu mulai muxolu no ano ne maxuvee malaxo uasi, ia mumalei la mino'a ta mitema sou xaixai tamei noxou tatananu tuala ne Aixiputo mine'e mi'unane'i no tani noxou itema sou xaixai uuli noxi'a ta mitema sou 'oto'oto. Anu itema tila ne ilo'a ta mitemau ixoxoo ane sou isaxisaxila'u taasou tatananu tuala ne Aixiputo. Ta mitema sou xaixai noxou tatananu tuala tamei ne, vile anu tila noxi'a ta mitema sou isaxisaxila'u uaini noxou tatananu tuala xe vile ne anu tila noxi'a ta mitema sou isaxisaxila'u la'ilalixu tatananu tuala. Ane'i ilou misusu no anu 'ilixo vile masua la tatananu tuala la'iaxui'a ilou misevile la sou mulai mu'unalailixa'a no taasou e Iosepu mulai mu'unalai no anu. 4 Mi'unalai mixoo no ano ne maxuvee misevile mole tila noxi'a ta mitema sou 'oto'oto ne musosovosou Iosepu sou usaxisaxila'a ilou. 5 Xe no 'olovoxo vile, la ane'i ta mitema tamei ne ilou miaipiepiena. Aipiepiena noxi'a ilou ne laaxu vilesisi uasi. Vile noxou aipiepiena ne vile mo xe vile noxou ne vile mo.

6 Iosepu mulutu no kakau xe mune'e muxali noxi'a ilou, la mumaisou ie'i ne la, ilou ie'i kalauasi. 7 Xe muavuti la mutali'isi'a ilou, “Loxovaa ane iengi kalaua loxo 'o? Tu'umaxu vile muxali noxinge ngongou vaimomo 'osi?”

8 Ane'i ilou miavuti la mivivkalanu aloxo 'o, “Nexi noxou teaipiepiena, la evile sou usu'ulinexi noxou sou ululusou laaxu uasi.” Xe Iosepu muavuti la muvikalane'i ilou aloxo 'o, “Lataua anusisi ane anu molu ulosou itema lavulavu sou ululusou aipiepiena. Ioxe, ngongou ngavikalalelixu aipiepiena noxinge ngongou vilevilesi.”

9 La sou anu ane sou usaxisaxila'u uaini noxou tatananu tuala ne mua'aloxu noxou tei. Muvikala aloxo 'o, “No anu aipiepiena noxilo, eni eai la emaisou uaini aiinu vile mutulu no talaxo, 10 ia avolu tatalusi. Xe alaxu vilesisi 'o la, volovoloxu mupaa vitanisi vaxa no avoavolu ne mo seseseenu kalumo. Xe alaxu vilesisi 'o la, tematemanu mupaa la mumomoxo alaxu vilesisi. 11 Eni a etutulu eteteli sou kapuxu tatananu tuala tila ne Aixiputo no avolo. Xe eavuti la eno'u uaini ngiangiaxu mumomoxo ne ka ekapinu mulu'elai no kapuxu ne ka elosou.”

12 Xe Iosepu muavuti la muvikalanu, “Aipiepiena noxine ne laaxu aloxo 'o. Uaini avolu tatalu ne voxo tatalu. 13 Voxo tatalusi a uxolu sou tatananu tuala ulaalixene sou ulivulixene ulai no anu xaixai noxine la. La sou nini nalosou kapuxu aloxo nini ne'oxo'oxo tei. 14 Ia ulai xe nini nalivu ulai no ale sou naxoo laixe, la ieni si'isilo uasi, naxavutalaleli lexe xoluxoluxene ne lailaixe ukalusi. Mo lexe tanenixo la naa'aloxo noxou tatananu tuala ne Aixiputo mo nasu'ulileli sou eni kalumo alaa axexesou tani ano 'o. 15 Xo eni 'o ne mino'ilosi ka misululeli vaxa noxi'a ta mitema no liaxa'a ta Evalaio no voxo ane ane'i ta mitema ane ne mimuamua'i minene'e loxo ne Aixiputo la sou ane'i milotoleli. Xe ene'e exoo ne lai 'o la, asusu no anu 'ilixo vile uasi, ia mino'ilo vitanisi ka ane mine'e mi'unaleli no taasou navunavu 'o.”

16 Iosepu ululusou aipiepiena noxou itema sou usaxila'u uaini ne, la itema sou usaxisaxila'u la'ilalixu tatananu tuala ne mulolomu vaxa noxou Iosepu, la aipiepiena laaxu e anu ululusou ne, anu tamaxu laixe no anu xavutala noxou. La sou anu muavuti vaxa la muvikalanu Iosepu, “Eni kalumo eaipiepiena lexe, eni evo'utulolixu ti'a sou veleti tatalu no kisilo ia e'ulu'u. 17 No nano no ti'a ane muai teitexi ne, la'ilali iouiou ane muxutu a mu'ana'ana no anu. Anu tatananu tuala ne Aixiputo la'ilalixu, ia ta ngiala mine'e mo a i'o'ou.”

18 Xe Iosepu muavuti la mululusou laaxu aipiepienau ne aloxo 'o. “Ti'a tatalu ne voxo tatalu. 19 Voxo tatalusi a uxolu sou tatananu tuala ulaalixene. Nalaa ulai no ale la ixotonu xolaneni. Xe ukalu la sou ilaa ovu vile ka ililixene no anu. Io sou ta ngiala ine'e i'ou xiasineni.” 20 Ilo'a mixoxoo no nano ne xe voxo tatalu mukalu la sou tatananu tuala ne Aixiputo ne mu'oxonu la'ilali vile toxoxa'a xa'a ta mitema sou xaixai noxou. Anu mu'oxonu la'ilali ane ne sou uxavutalanu voxo ane nenu mivo'onu no anu. La sou muvikala, la milaalixa'a itema sou xaixai noxou sou usaxisaxila'u uaini xe itema sou usaxisaxila'u la'ilali. 21 Xe ilou milaa mukalu, la sou tatananu tuala muvikalanu itema sou usaxisaxila'u uaini ne sou mulivu mulai no anu xaixai noxou. 22 Xe muavuti la muvikalane'i ta mitema sou 'oto'oto noxou sou mililixu itema sou usaxisaxila'u la'ilali ne no ovu e milaanu. Mimii ane ne muxali ne aloxo Iosepu mulemolu ne.

23 Ia itema sou usaxisaxila'u uaini ne iou si'isou Iosepu ne mole uxavutalanu la ua.